تین لاپتہ افراد کی شناخت ایڈیشنل سیکرٹری دفاع کا حتمی تعداد بتانے سے گریز

اسلام آباد… لاپتہ افراد کو سپریم کورٹ میں پیش کردیا گیا،جن میں سے 3 کی شناخت ہوگئی ہے، باقی کیلئے سپریم کورٹ کے روبہ رو سوال جواب جاری ہیں۔ ایڈیشنل سیکرٹری دفاع کا پیش کیے گئے افراد کی حتمی تعداد بتانے سے گریزکرتے ہوئے کہا ہے کہ کافی افراد ہیں۔ لاپتہ افراد کو دو گاڑی میں سپریم کورٹ لایاگیا، تمام کے افراد نے چہرے چادر سے ڈھانپ رکھے تھے۔جسٹس امیر ہانی مسلم عدالت کے کمرہ نمبر 6 میں ان افراد کی شناخت کے بارے میں سوالات کررہے ہیں۔ وزارت دفاع کے حکام نے لاپتہ افراد کو لانے والی گاڑی کو اندر لانے کی استدعا کی تھی جس پر عدالت نے گاڑی کو اندر لانے کی اجازت دی۔ایڈیشنل سیکریٹری دفاع کا کہنا ہے کہ تمام افراد کو ڈھونڈ کر لایا گیا ہے، یہ تمام افراد آزادانہ زندگی گزار رہے تھے۔اس سے قبل اٹارنی جنرل منیر اے ملک نے جسٹس امیر ہانی مسلم سے ملاقات بھی کی۔گذشتہ روز سماعت کے دوران چیف جسٹس افتخارمحمد چوہدری نے 15 لاپتہ افراد کو آج سپریم کورٹ کے جسٹس امیر ہانی مسلم کے چیمبر میں پیش کرنے کی ہدایت کرتے ہوئے کہاتھاکہ جسٹس امیر ہانی مسلم اور اٹارنی جنرل لاپتہ افراد کی شناخت کے بارے میں سوالات کر سکیں گے۔چیف جسٹس افتخار محمد کی سربراہی میں جسٹس جواد ایس خواجہ اور جسٹس امیر ہانی مسلم پر مشتمل سپریم کورٹ کا تین رکنی بینچ لاپتہ افراد کیس کی سماعت کررہا ہے۔