جمہوریت کو خطرہ ہوا تو نواز شریف کے ساتھ کھڑے ہوں گے، بلاول بھٹو زرداری

لاڑکانہ: پاکستان پیپلزپارٹی کے چیرمین بلاول بھٹو زرداری نے کہا ہے کہ نواز شریف کو یقین دلاتا ہوں اگر جمہوریت کو خطرہ ہوا تو ہم ان کے ساتھ کھڑے ہوں گے۔

گڑھی خدا بخش میں سابق وزیراعظم بے نظیر بھٹو کی چھٹی برسی کے موقع پر جلسے سے خطاب کرتےہوئے بلاول بھٹو زرداری کا کہنا تھا کہ میں نے اپنی ماں کے اکلوتے بیٹے کی حیثیت سے قبر پر ٹوٹے ہوئے دل اور بہتے ہوئے آنسوؤں کے درمیان کھڑے ہوکر بھی نفرتوں کا کاروبار نہیں کیا بلکہ امید کو گلے لگایا اور آپ کو ایک ہی پیغام دیا کہ جمہوریت بہترین انتقام ہے اور پاکستان کی عوام نے جمہوریت کا تحفہ دے کر میری ماں کے ناحق خون کا بدلہ لے لیا، آج ہم جمہوریت کا سائے تلے زندگی گزار رہےہیں۔

بلاول بھٹو زرداری نے کہاکہ آئیں آج آصف علی زرداری کا شکریہ ادا کریں جنہوں نے اپنی زندگی کے ساڑھے گیارہ سال جمہوریت کی خاطر جیل میں گزار دیئے۔ بے نظیر پر حملے کے وقت پاکستان ٹوٹنے کے موڑ پر کھڑا تھا لیکن آصف زرداری نے آگ اور خون کے درمیان کھڑے ہوکر ایک ہی آواز بلند کرکے پاکستان کی بقا کا نعرہ لگایا۔

بلاول نے کا کہنا تھا کہ پچھلے الیکشن میں ہم نے 100 سیٹوں کی خاطر بے نظیر بھٹو اور کارکنوں کی قربانی دی تھی لیکن اس بار اپنے کارکنوں کی زندگی بچانے کے لئے 100 سیٹیں قربان کردیں، یہ وہ الیکشن تھے جن میں صرف ان جماعتوں کو انتخابی مہم چلانے کی آزادی تھی جن کو طالبان کی شفقت حاصل تھی اور صرف انہیں ہی گھروں کو نلنے کی اجازت دی گئی۔ انہوں نے اسفندیارولی خان، الطاف حسین اور ہمیں مجبور کردیا گیا تھاکہ ویڈیولنک کے مہم چلائیں۔ یہ الیکشن شفاف نہیں تھے یہ جانتے ہوئے بھی ہم نے نتائج کو قبول کیا کیوں کہ ہم جمہوریت سے پیار کرتےہیں اور اس بات پر یقین رکھتےہیں کہ بدترین جمہوریت بہترین آمریت سے بہتر ہے۔

پیپلزپارٹی کے چیرمین کا کہنا تھاکہ اب پاکستان پر ان لوگوں کی حکومت ہے جنہیں اپنے وعدوں سے پھر جانے کی عادت ہے۔ اب یہ عالم ہے کہ صبح کا وعدہ شام اور شام کا وعدہ صبح ٹوٹتا ہے۔ یہ وہی لوگ ہیں جو کہتے تھے کہ اگر 6 مہینے میں بجلی نہ دی تو میرا نام بدل دینا۔ انہوں نے کہا کہ ہم تو ان کا نیا نام ہی سوچتے رہتےہیں لیکن اتنی دیر میں وہ خود بدل جاتے ہیں۔

بلاول بھٹو زرداری کا کہنا ہے کہ اسٹیبلشمنٹ اورعدلیہ کے چندعناصرنہیں چاہتے تھےکہ پیپلزپارٹی انتخابات میں کامیابی حاصل کرے، عام انتخابات میں بد ترین دھاندلی ہوئی اورپیپلز پارٹی کو پنجاب کی سرحد پر روک لیا گیا جب کہ سونامی کوبھی پنجاب میں جیتنے نہ دیا گیا۔ انہوں نے کہاکہ ہم نے ہر دور کے آمر سے ٹکر لی، ہمیں پتا ہے کہ جمہوریت کو کیسے خطرات ہیں اگر پاکستان کی حفاظت کرنا زہر کا پیالہ پینے کے مترادف ہے تو میں نے یہ پیالا اٹھا لیا ہے۔

 بعد ازاں سابق صدر آصف علی زرداری نے مختصر خطاب میں کہا کہ  پاکستان کے لئے ہر کام وزیراعظم نوازشریف تنہا نہیں کر سکتے،جمہوریت کے استحکام کے لئے حکومت کے ساتھ چلنے کو تیار ہیں اور پارلیمنٹ کے اندر اور باہر حکومت کو نجکاری سمیت دیگر کمزوریاں یاد دلاتے رہیں گے۔ آصف علی زرداری نے کہا کہ ملکی 65 سالہ تاریخ میں ہمیشہ سیاسی قوتوں کو لڑایا گیا جبکہ کوئی بِلا رات و رات آکر دودھ پی جاتا رہا ہے، یہ کوئی مذاق نہیں کہ وزیراعظم کو ہتھکڑی لگا دی جائے، طاقت کا مظاہرہ کرنے والا بِلا اب جکڑا جاچکا ہے، بِلے کو انجام تک پہنچانے کے لئے حکومت کے ساتھ کھڑے ہیں۔

سابق صدر مملکت نے مزید کہا کہ قوموں پر آزمائشیں آتی رہتی ہیں، سری لنکا میں 40 سال تک قوموں کو آپس میں لڑایا گیا اسی طرح پاکستان میں بھی قوموں کو لڑانے کی سازش ہو رہی ہے،طالبانائزیشن کے خاتمے کے لئے غربت کو ختم کرنا ہوگا۔

بیروت میں دھماکا: سابق وزیرمالیات محمد شطح سمیت 5 افراد جاں بحق

بیروت… لبنان کے دارالحکومت بیروت میں دھماکے میں سابق وزیرمالیات محمد شطح سمیت 5 افراد جاں بحق ہوگئے ہیں دھماکا دارالحکومت بیروت میں سیرالی کے علاقے میں کیا گیا۔ جہاں پارلیمنٹ ، وزیراعظم ہاوس اور کئی اہم دفاتر موجود ہیں ، دھماکااتنا شدید تھا کہ اس کی آواز دور دور تک سنائی دی ، دھماکے کے بعد گاڑیوں میں آگ لگ گئی۔ کاربم دھماکے میں سابق وزیراعظم سعد الحریری کے مشیر اور وزیرمالیات محمد شطح جاں سمیت متعد افراد ہوگئے ہیں، درجنوں زخمی ہیں۔

برطانیہ 2030 تک ’یورپ کی سب سے بڑی معیشت

ایک برطانوی تھنک ٹینک نے کہا ہے کہ برطانیہ 2030 میں جرمنی کو، جب کہ چین 2028 میں امریکہ کو معاشی میدان میں پیچھے چھوڑ دے گا۔

تھنک ٹینک سی ای بی آر کے مطابق برطانوی معیشت میں تیزی کی بڑی وجہ اس کی آبادی میں نسبتاً زیادہ سرعت سے ہونے والا اضافہ ہے۔

یہ پیشن گوئی حال ہی میں برطانوی معیشت کے بارے میں آنے والی دوسری ایسی ہی مثبت رپورٹوں کی تائید کرتی ہے، جن میں برطانوی چیمبر آف کامرس کی رپورٹ بھی شامل ہے۔

اس ماہ کے اوائل میں برطانوی چیمبر آف کامرس نے کہا تھا کہ برطانیہ کی معیشت 2014 میں مالی بحران سے قبل کی سطح سے آگے نکل جائے گی۔

سی ای بی آر نے اپنا سالانہ عالمی معاشی شماریاتی جائزہ جاری کیا ہے جس میں عالمی معیشتوں کے اتار چڑھاؤ کی درجہ بندی کی گئی ہے۔

رپورٹ میں یہ بھی کہا گیا ہے کہ چین 2028 میں امریکہ سے آگے نکل جائے گا۔ دوسرے ماہرین کے مطابق چین اس سال سے پہلے ہی امریکہ کو پیچھے چھوڑ دے گا۔

سی ای بی آر کی رپورٹ کے مطابق برطانیہ کی کارکردگی ترقی ممالک میں دوسرے نمبر پر ہو گی۔ تاہم یہ معاشی کارکردگی بھارت اور برازیل جیسے ترقی پذیر ملکوں کی معاشی شرحِ نمو سے کہیں کم ہو گی۔

سی ای بی آر نے مزید کہا ہے کہ آبادی میں اضافے کے علاوہ برطانوی معیشت کے پھیلاؤ کی ایک اور وجہ ’دوسرے یورپی ملکوں پر کم انحصار، اور دوسرے یورپی ملکوں کے مقابلے پر کم ٹیکس ہیں۔‘

تاہم تھنک ٹینک نے کہا کہ اگر یورپی یونین ٹوٹ گئی تو جرمنی کہیں زیادہ ترقی کر سکتا ہے۔

ادارے نے فرانس کے بارے میں کہا ہے کہ یہ مغربی ممالک میں بدترین کارکردگی دکھانے والے ملکوں میں سے ایک ہو گا اور برطانیہ 2018 میں اس سے آگے نکل جائے گا۔

اس کی وجہ سی ای بی آر نے زیادہ ٹیکس اور یورو زون کے مسائل بتائی ہے۔

حکومت دہشتگردی سے نمٹنے اور بہتر طرز حکمرانی کیلئے پرعزم ہے،وزیر عظم

اسلام آباد…وزیراعظم نوازشریف نے کہا ہے کہحکومت دہشت گردی سے نمٹنے اور بہتر طرز حکمرانی کیلئے پرعزم ہے۔ دفتر خارجہ میں قائم نئے بلاک کے افتتاح کے بعد تقریب سے خطاب کرتے ہوئے وزیر اعظم نے کہا کہ کسی بھی ریاست کیلئے سفارت کاری اہمیت کی حامل ہوتی ہے، روایتی سفارت کاری میں جدت لانے کی ضرورت ہے، علاقائی اورعالمی تعاون کیلئے دفترخارجہ کا کرداراہم ہے۔ وزیر اعظم نے کہا کہ کوئی ملک تنہانہیں رہ سکتا، بھارت سمیت ہمسایہ ممالک کے ساتھ دوستانہ تعلقات چاہتے ہیں اور یورپ کے ساتھ تعلقات کو بھی فروغ دے رہے ہیں۔ نواز شریف نے کہا کہ پاکستان میں اقتدار پرامن طور پر منتقل ہوا، ملک میں آزاد عدلیہ اور آزاد میڈیا موجود ہے۔ انہوں نے کہا کہ دہشت گردی سے نمٹنا ہے اور طرز حکمرانی کو بہتربنانا ہے۔نئے بلاک کو سابق وزیرخارجہ صاحبزادہ یعقوب خان کے نام سے منسوب کیا گیا ہے۔

مشرف کی والدہ کو لانے کے لیے خصوصی طیارہ بھیجنے کو تیار ہیں، پرویزرشید

اسلام آباد…حکومت نے پرویز مشرف کو والدہ سے ملوانے کیلیے تعاون کی پیش کش کردی، وزیراطلاعات کا کہنا ہے کہ مشرف کی والدہ کو پاکستان لانے کے لیے خصوصی طیارہ بھیجنے کو تیار ہیں، مشرف کو محفوظ راستہ نہیں دیا جائے گا۔مشرف سے پہلے ڈیل کی نہ اب کریں گے ۔مستقبل کا فیصلہ آزاد عدلیہ کریگی ۔حکومت نے نہ صرف مشرف کو محفوظ راستہ دینے کا امکان مسترد کردیا بلکہ ان کے ملک میں ہی رہنے کا جواز بھی فراہم کردیا ہے ، ای سی ایل سے نام نکالوانے کیلیے مشرف کا ایک موقف یہ بھی تھا کہ وہ اپنی علیل والدہ کی عیادت کیلیے جانا چاہتے ہیں۔وزیراطلاعات پرویز رشید نے کہا ہے کہ پرویز مشرف کی والدہ کو پاکستان لانے کیلیے خصوصی طیارہ بھیجنے کو تیار ہیں ، حکومت انہیں علاج کیلیے بھی بھرپور سہولتیں فراہم کرے گی۔پرویز رشید کا یہ بھی کہنا تھا کہ پرویز مشرف کے خلاف کیسز کے لیے حکومتی قانونی ٹیم ثبوت عدالتوں میں پیش کرے گی اور مشرف کے مستقبل کا فیصلہ آزاد عدلیہ کریگی۔