اپنے اقدامات کی وجہ سے حکومت زیادہ عرصے چلتی نظر نہیں آتی، عمران خان

لاہور: تحریک انصاف کے چیرمین عمران خان کہتے ہیں کہ عام انتخابات میں الیکشن کمیشن اور عدلیہ نے اپنا کردار ادا نہیں کیا اور موجودہ حکومت بھی اپنے اقدامات کی وجہ سے زیادہ عرصے چلتی نظر نہیں آتی۔

لاہور میں اپنی رہائش گاہ پر میڈیا سے بات کرتے ہوئے عمران خان نے کہا کہ ان کے یا ان کے بچوں کے بیرون ملک کوئی اثاثے نہیں، اپنے اثاثے بیرون ملک رکھنے والے سیاستدان ملک سے مخلص نہیں۔ آئین کے مطابق اگر دہری شہریت رکھنے والے نااہل ہیں تو اپنے اثاثے بیرون ملک رکھنے والے بھی نااہل ہونے چاہئیں۔ ان کا کہنا تھا کہ وزیر اعظم نوازشریف کہتے ہیں نیٹو سپلائی روک کر ملک کو دیوار سے لگایا جارہا ہے، اگر ایسا ہے تو پھر نیٹو سپلائی کی بندش کے لئے پارلیمنٹ میں قراردادیں کیوں منظور کی گئیں اور اس سلسلے میں بلائی گئی اے پی سی بھی ڈرامہ ثابت ہوتی ہے۔

تحریک انصاف کے چیرمین کا کہنا تھا کہ ماضی میں مسلم لیگ(ن) کی بنیاد نیلام گھر پر رکھی گئی، انہوں نے نوے کی دہائی میں سیاستدانوں کی خریدا و فروخت کی  اور چھانگا مانگا کی سیاست شروع کی، انہوں نے کہا کہ وہ کالا باغ ڈیم کے مخالف نہیں لیکن اس سلسلے میں پنجاب کو بھی ذمہ دارانہ کردار ادا کرنا چاہئے۔

ون ڈے میں سعید اجمل کی بادشاہت برقرار، حفیظ نے بھی کیرئیر کی بہترین پوزیشن حاصل کرلی

دبئی: انتڑنیشنل کرکٹ کونسل کی ایک روزہ میچوں کی نئی رینکنگ میں جادوگر اسپنر سعید اجمل کی بادشاہت برقرار ہے جبکہ بیٹنگ میں محمد حفیظ نے کیرئر کی بہترین رینکنگ حاصل کر لی ہے۔

آئی سی سی کی جانب سے نئی ون ڈے رینکنگ کے مطابق آل راؤنڈرز میں محمد حفیظ نے بنگلہ دیش کے شکیب الحسن سے پہلی پوزیشن چھین لی ہے جبکہ بیٹنگ میں بھی محمد حفیظ پہلی بار 20 بہرین کھلاڑیوں کی فہرست میں شامل ہو گئے ہیں اور سری لنکا کے کے خلاف شاندار کارکردیگ کا مظاہرہ کرنے کے بعد ان کی پوزیشن 16ویں نمبر پر ہے۔ پاکستان کے کپتان مصباح الحق 9ویں نمبر پر ہیں۔ سعید اجمل باؤلنگ میں پہلی پوزیشن پر قابض ہیں جبکہ جنید خان 11 درجے ترقی کرکے 11ویں نمبرپر آگئے ہیں۔

بھارت لائن آف کنٹرول پرغیر قانونی تعمیرات روکنے پر رضامند

لاہور: پاکستان اور بھارت کی سرحدی فورسز کے اجلاس میں فیصلہ کیا گیا ہے کہ بھارت مقبوضہ کشمیر میں لائن آف کنٹرول پر غیر قانونی تعمیرات نہیں کرے گا اور منشیات کی اسمگلنگ کے لئے دونوں ممالک مشترکہ پٹرولنگ کریں کریں گے۔

ایکسپریس نیوز کے مطابق پاکستان اور بھارت کی سرحدی فورسز کے درمیان گزشتہ 5 روز سے جاری اجلاس کے مشترکہ اعلامیے میں منشیات کی اسمگلنگ کی روک تھام کے لئے خفیہ معلومات کے فوری تبادلے پر اتفاق کیا گیا ہے، منشیات کی اسمگلنگ روکنے کے لئے دونوں ممالک کی سرحدی فورسز مشترکہ پٹرولنگ کریں گی۔ اعلامیے میں یہ بھی فیصلہ کیا گیا ہے کہ غیر قانونی بارڈر کراسنگ کو روکا جائے گا اور غلطی سے سرحد کراس کرنے والوں کے بارے میں دونوں ممالک ایک دوسرے کو فوری طور پر آگاہ کریں گے اور ان کی واپسی کو یقینی بنایا جائے گا۔

مشترکہ اعلامیے میں یہ فیصلہ بھی کیا گیا ہے کہ بھارت مقبوضہ کشمیر میں لائن آف کنٹرول پر غیر قانونی تعمیرات نہیں کرے گا اور اعتماد سازی کے لئے پاک بھارت ڈی جی ملٹری آپریشنز کی ملاقات میں ہونے والے میکینزم پر عمل درآمد پر یقینی بنایا جائے گا، اس کے علاوہ سرحد پر معمولی نوعیت کے تنازعات کو سیکٹر کمانڈر کی سطح پر فوری طور پر فلیگ میٹنگ بلا کر حل کیا جائے گا۔

واضح رہے کہ پاکستان اور بھارت کے ڈی جی ملٹری آپریشنز کا اجلاس 14 سال بعد 24 دسمبر کو لاہور میں شروع ہوا، پاکستانی وفد کی قیادت میجر جنرل عامر ریاض جبکہ بھارتی وفد کی قیادت جنرل ونود بھاٹیا نے کی۔ پاکستان کی جانب سے مطالبہ کیا گیا تھا کہ بھارت مقبوضہ کشمیر میں لائن آف کنٹرول پر دیوار کی تعمیر روکے اور لائن آف کنٹرول پر ماہر نشانہ بازوں کو تعینات نہ کیا جائے۔

چوہدری نثار سے ایم کیوایم کے وفد کی ملاقات، سندھ میں مشترکہ سیاسی حکمت عملی طے کرنے پر اتفاق

کراچی: متحدہ قومی موومنٹ کے وفد نے وفاقی وزیر داخلہ چوہدری نثار علی خان سے ملاقات کی ہے جس میں شہر میں امن و امان کی موجودہ صورت حال اور دیگر امور پر تبادلہ خیال کیا گیا ہے۔

ایم کیو ایم کی جانب سے جاری کردہ اعلامیے کے مطابق گورنر ہاؤس کراچی میں ہونے والی اس ملاقات میں متحدہ قومی موؤمنٹ کے وفد میں ڈاکٹر خالد مقبول صدیقی، ڈاکٹر فاروق ستار، ڈاکٹر صغیراحمد، سید سردار احمد اور کنور نوید جمیل شامل تھے، 45 منٹ تک جاری رہنے والی ملاقات کے دوران ایم کیو ایم کے وفد نے وفاقی وزیر داخلہ کو کراچی میں جاری ٹارگٹڈ آپریشن اور کارکنوں کے ماورائے عدالت قتل سے متعلق اپنے تحفظات سے آگاہ کیا، جس پر چوہدری نثار علی خان نے انہیں تحفظات دور کرنے کی یقین دہانی کرائی۔

ذرائع کا کہنا ہے کہ ملاقات کے دوران سندھ میں ایم کیو ایم اور مسلم لیگ (ن) کے درمیان مشترکہ سیاسی حکمت عملی طے کرنے اور دونوں جماعتوں کے رہنماؤں کے درمیان ملاقات کا سلسلہ جاری رکھنے پر بھی اتفاق ہوا۔

ایم کیو ایم کے وفد سے ملاقات سے قبل وفاقی وزیر داخلہ چوہدری نثار علی خان نے گورنر سندھ ڈاکٹر عشرت العباد خان سے بھی ملاقات کی جس میں امن و امان کی صورت حال سمیت دیگر امور پر تبادلہ خیال کیا گیا۔

جمہوریت کو خطرہ ہوا تو نواز شریف کے ساتھ کھڑے ہوں گے، بلاول بھٹو زرداری

لاڑکانہ: پاکستان پیپلزپارٹی کے چیرمین بلاول بھٹو زرداری نے کہا ہے کہ نواز شریف کو یقین دلاتا ہوں اگر جمہوریت کو خطرہ ہوا تو ہم ان کے ساتھ کھڑے ہوں گے۔

گڑھی خدا بخش میں سابق وزیراعظم بے نظیر بھٹو کی چھٹی برسی کے موقع پر جلسے سے خطاب کرتےہوئے بلاول بھٹو زرداری کا کہنا تھا کہ میں نے اپنی ماں کے اکلوتے بیٹے کی حیثیت سے قبر پر ٹوٹے ہوئے دل اور بہتے ہوئے آنسوؤں کے درمیان کھڑے ہوکر بھی نفرتوں کا کاروبار نہیں کیا بلکہ امید کو گلے لگایا اور آپ کو ایک ہی پیغام دیا کہ جمہوریت بہترین انتقام ہے اور پاکستان کی عوام نے جمہوریت کا تحفہ دے کر میری ماں کے ناحق خون کا بدلہ لے لیا، آج ہم جمہوریت کا سائے تلے زندگی گزار رہےہیں۔

بلاول بھٹو زرداری نے کہاکہ آئیں آج آصف علی زرداری کا شکریہ ادا کریں جنہوں نے اپنی زندگی کے ساڑھے گیارہ سال جمہوریت کی خاطر جیل میں گزار دیئے۔ بے نظیر پر حملے کے وقت پاکستان ٹوٹنے کے موڑ پر کھڑا تھا لیکن آصف زرداری نے آگ اور خون کے درمیان کھڑے ہوکر ایک ہی آواز بلند کرکے پاکستان کی بقا کا نعرہ لگایا۔

بلاول نے کا کہنا تھا کہ پچھلے الیکشن میں ہم نے 100 سیٹوں کی خاطر بے نظیر بھٹو اور کارکنوں کی قربانی دی تھی لیکن اس بار اپنے کارکنوں کی زندگی بچانے کے لئے 100 سیٹیں قربان کردیں، یہ وہ الیکشن تھے جن میں صرف ان جماعتوں کو انتخابی مہم چلانے کی آزادی تھی جن کو طالبان کی شفقت حاصل تھی اور صرف انہیں ہی گھروں کو نلنے کی اجازت دی گئی۔ انہوں نے اسفندیارولی خان، الطاف حسین اور ہمیں مجبور کردیا گیا تھاکہ ویڈیولنک کے مہم چلائیں۔ یہ الیکشن شفاف نہیں تھے یہ جانتے ہوئے بھی ہم نے نتائج کو قبول کیا کیوں کہ ہم جمہوریت سے پیار کرتےہیں اور اس بات پر یقین رکھتےہیں کہ بدترین جمہوریت بہترین آمریت سے بہتر ہے۔

پیپلزپارٹی کے چیرمین کا کہنا تھاکہ اب پاکستان پر ان لوگوں کی حکومت ہے جنہیں اپنے وعدوں سے پھر جانے کی عادت ہے۔ اب یہ عالم ہے کہ صبح کا وعدہ شام اور شام کا وعدہ صبح ٹوٹتا ہے۔ یہ وہی لوگ ہیں جو کہتے تھے کہ اگر 6 مہینے میں بجلی نہ دی تو میرا نام بدل دینا۔ انہوں نے کہا کہ ہم تو ان کا نیا نام ہی سوچتے رہتےہیں لیکن اتنی دیر میں وہ خود بدل جاتے ہیں۔

بلاول بھٹو زرداری کا کہنا ہے کہ اسٹیبلشمنٹ اورعدلیہ کے چندعناصرنہیں چاہتے تھےکہ پیپلزپارٹی انتخابات میں کامیابی حاصل کرے، عام انتخابات میں بد ترین دھاندلی ہوئی اورپیپلز پارٹی کو پنجاب کی سرحد پر روک لیا گیا جب کہ سونامی کوبھی پنجاب میں جیتنے نہ دیا گیا۔ انہوں نے کہاکہ ہم نے ہر دور کے آمر سے ٹکر لی، ہمیں پتا ہے کہ جمہوریت کو کیسے خطرات ہیں اگر پاکستان کی حفاظت کرنا زہر کا پیالہ پینے کے مترادف ہے تو میں نے یہ پیالا اٹھا لیا ہے۔

 بعد ازاں سابق صدر آصف علی زرداری نے مختصر خطاب میں کہا کہ  پاکستان کے لئے ہر کام وزیراعظم نوازشریف تنہا نہیں کر سکتے،جمہوریت کے استحکام کے لئے حکومت کے ساتھ چلنے کو تیار ہیں اور پارلیمنٹ کے اندر اور باہر حکومت کو نجکاری سمیت دیگر کمزوریاں یاد دلاتے رہیں گے۔ آصف علی زرداری نے کہا کہ ملکی 65 سالہ تاریخ میں ہمیشہ سیاسی قوتوں کو لڑایا گیا جبکہ کوئی بِلا رات و رات آکر دودھ پی جاتا رہا ہے، یہ کوئی مذاق نہیں کہ وزیراعظم کو ہتھکڑی لگا دی جائے، طاقت کا مظاہرہ کرنے والا بِلا اب جکڑا جاچکا ہے، بِلے کو انجام تک پہنچانے کے لئے حکومت کے ساتھ کھڑے ہیں۔

سابق صدر مملکت نے مزید کہا کہ قوموں پر آزمائشیں آتی رہتی ہیں، سری لنکا میں 40 سال تک قوموں کو آپس میں لڑایا گیا اسی طرح پاکستان میں بھی قوموں کو لڑانے کی سازش ہو رہی ہے،طالبانائزیشن کے خاتمے کے لئے غربت کو ختم کرنا ہوگا۔

بیروت میں دھماکا: سابق وزیرمالیات محمد شطح سمیت 5 افراد جاں بحق

بیروت… لبنان کے دارالحکومت بیروت میں دھماکے میں سابق وزیرمالیات محمد شطح سمیت 5 افراد جاں بحق ہوگئے ہیں دھماکا دارالحکومت بیروت میں سیرالی کے علاقے میں کیا گیا۔ جہاں پارلیمنٹ ، وزیراعظم ہاوس اور کئی اہم دفاتر موجود ہیں ، دھماکااتنا شدید تھا کہ اس کی آواز دور دور تک سنائی دی ، دھماکے کے بعد گاڑیوں میں آگ لگ گئی۔ کاربم دھماکے میں سابق وزیراعظم سعد الحریری کے مشیر اور وزیرمالیات محمد شطح جاں سمیت متعد افراد ہوگئے ہیں، درجنوں زخمی ہیں۔

برطانیہ 2030 تک ’یورپ کی سب سے بڑی معیشت

ایک برطانوی تھنک ٹینک نے کہا ہے کہ برطانیہ 2030 میں جرمنی کو، جب کہ چین 2028 میں امریکہ کو معاشی میدان میں پیچھے چھوڑ دے گا۔

تھنک ٹینک سی ای بی آر کے مطابق برطانوی معیشت میں تیزی کی بڑی وجہ اس کی آبادی میں نسبتاً زیادہ سرعت سے ہونے والا اضافہ ہے۔

یہ پیشن گوئی حال ہی میں برطانوی معیشت کے بارے میں آنے والی دوسری ایسی ہی مثبت رپورٹوں کی تائید کرتی ہے، جن میں برطانوی چیمبر آف کامرس کی رپورٹ بھی شامل ہے۔

اس ماہ کے اوائل میں برطانوی چیمبر آف کامرس نے کہا تھا کہ برطانیہ کی معیشت 2014 میں مالی بحران سے قبل کی سطح سے آگے نکل جائے گی۔

سی ای بی آر نے اپنا سالانہ عالمی معاشی شماریاتی جائزہ جاری کیا ہے جس میں عالمی معیشتوں کے اتار چڑھاؤ کی درجہ بندی کی گئی ہے۔

رپورٹ میں یہ بھی کہا گیا ہے کہ چین 2028 میں امریکہ سے آگے نکل جائے گا۔ دوسرے ماہرین کے مطابق چین اس سال سے پہلے ہی امریکہ کو پیچھے چھوڑ دے گا۔

سی ای بی آر کی رپورٹ کے مطابق برطانیہ کی کارکردگی ترقی ممالک میں دوسرے نمبر پر ہو گی۔ تاہم یہ معاشی کارکردگی بھارت اور برازیل جیسے ترقی پذیر ملکوں کی معاشی شرحِ نمو سے کہیں کم ہو گی۔

سی ای بی آر نے مزید کہا ہے کہ آبادی میں اضافے کے علاوہ برطانوی معیشت کے پھیلاؤ کی ایک اور وجہ ’دوسرے یورپی ملکوں پر کم انحصار، اور دوسرے یورپی ملکوں کے مقابلے پر کم ٹیکس ہیں۔‘

تاہم تھنک ٹینک نے کہا کہ اگر یورپی یونین ٹوٹ گئی تو جرمنی کہیں زیادہ ترقی کر سکتا ہے۔

ادارے نے فرانس کے بارے میں کہا ہے کہ یہ مغربی ممالک میں بدترین کارکردگی دکھانے والے ملکوں میں سے ایک ہو گا اور برطانیہ 2018 میں اس سے آگے نکل جائے گا۔

اس کی وجہ سی ای بی آر نے زیادہ ٹیکس اور یورو زون کے مسائل بتائی ہے۔