ایم کیو ایم بدلہ لینے پرنہیں،معاف کرنے پر یقین رکھتی ہے،الطاف حسین

کراچی…متحدہ کے قائد الطاف حسین نے کہا ہے کہہم کسی سے نہیں ڈرتے،عوام بھی نہ ڈریں ،میں وضاحت نہیں کررہا، نہ کبھی کسی کو وضاحت کی ،تاہم یہ کہنا چاہتا ہوں کہ میرے گزشتہ بیان کو سیاق و سباق سے ہٹا کر بیان کیا گیا،کراچی میں جلسے سے خطاب کرتے ہو ئے کہا کہ آج کھلی باتیں ہوں گی کیونکہ کچھ لوگوں کو کھل کر بات بتانا پڑتی ہے۔چاروں طرف سے دروازے بند کردیئے جائیں تو لوگ راستہ نکال ہی لیتے ہیں،ورنہ طاقت کی بنیادپر کسی کی جائز آواز کو دبایا نہیں جاسکتا، میں کہتا ہوں کہ ہمیں ماضی سے سبق سیکھنا چاہیے،آج بھی ہم کڑے سے کڑے حالات کا مقابلہ کرنے کے لیے تیار ہیں، طاقت کی بات نہیں کی جائے ورنہ اس جلسے کی تعداد سب کے سامنے ہے۔میں جو کہتاہوں وہ کرتا ہوں، ایم کیو ایم بدلہ لینے پرنہیں،معاف کرنے پر یقین رکھتی ہے۔

نیند میں کمی دماغ کو نقصان پہنچانے کا سبب بن سکتی ہے،نئی تحقیق

اسٹاک ہوم …این جی ٹی …نیند میں کمی جسمانی طور پر تو بہت سے مسائل کا سبب بن سکتی ہے مگر اب تو ماہرین نے اسے دماغ کے لئے بھی مضر قرار دیا ہے۔ سوئیڈن میں ہونے والی ایک تحقیق کے مطابق نیند میں کمی دماغ کے لئے سر پر کسی زوردار چوٹ لگنے سے بھی زیادہ نقصان دہ ثابت ہو سکتی ہے۔ ماہرین کے مطابق نیند پوری نہ ہونے سے خون میں ایسے مالیکیولز بڑھ جاتے ہیں جودماغ میں خون کی مقدار بڑھانے کا کام کرتے ہیں اور ایسا سر پر شدید چوٹ لگنے کی صورت میں بھی ہوتا ہے۔

چودہ سالہ امریکی ویٹ لفٹر کا اپنے جسمانی وزن سے دوگنا وزن اٹھانے کا ریکارڈ

میری لینڈ… این جی ٹی…اکثر والدین اپنے بچوں کو وزن اٹھانے سے منع کرتے ہیں کہ کہیں اس چکر میں کو ئی ہڈی نہ ٹوٹ جائے لیکن امریکی ریاست Maryland میں ایک بچہ ایسا بھی ہے جو ویٹ لفٹنگ کے میدان میں اپنی پہچان بناچکا ہے۔ چودہ سالہJake Schellenschlager بارہ سال کی عمر سے باقاعدہ طور پر ویٹ لفٹنگ کی تربیت لے رہا ہے جس نے اپنے جسمانی وزن سے دوگنا وزن لفٹ کر کے عالمی ریکارڈ بھی اپنے نا م کر لیا ہے۔Jake نے ابھی اس کم عمری میں فتوحات کا آغاز ورلڈ ریکارڈ اپنے نام کر نے کے ساتھ ہی کیا ہے اور عمر بڑھنے کے ساتھ ساتھ ان فتوحات میں اضافہ کر نے کیلئے بھی کافی پر جوش ہے۔

بنگلا دیش میں انتخابات ، ہنگامہ آرائی اور فائرنگ،11 افراد ہلاک

ڈھاکا…بنگلا دیش میں عام انتخابات کے دوران زبردست ہنگامہ آرائی اور فائرنگ کے واقعات میں پولنگ افسر سمیت 11 افراد ہلاک ہوگئے،200 پولنگ اسٹیشن نذر آتش جبکہ 157 میں ووٹنگ معطل کردی گئی۔ بنگلہ دیش میں حزب اختلاف کی جماعتوں کے بائیکاٹ کے باوجود پارلیمانی انتخابات کیلئے پولنگ جاری ہے ۔ بنگلادیش میں کئی ہفتوں سے جاری ہنگاموں میں ہلاکتوں کی تعداد 100 سے تجاوز کرگئی۔دوسری جانب امریکہ، یورپی یونین اور دولت مشترکہ نے بھی بنگلہ دیش میں انتخابات کی نگرانی کرنے کے لیے اپنے مبصرین بھیجنے سے انکار کر دیا۔انتخابی عمل ورنگراں حکومت سے خائف حزبِ مخالف کی بڑی جماعت بنگلہ دیش نیشنل پارٹی سمیت 20 جماعتو ں نے انتخابات کا بائیکاٹ کر رکھا ہے، بنگلہ دیش نیشنل پارٹی سربراہ خالدہ ضیا کو گھر میں نظر بند ہیں اور ہزاروں مظاہرین سڑکوں پر آگئے ہیں۔دارالحکومت ڈھاکا میں پولیس اسٹیشن پربھی دو پیٹرول بم حملے ہوئے جن میں پولیس اہلکارسمیت 3 افراد زخمی ہوئے۔شمالی ضلع بوگرہ کے پولیس چیف سید ابو صائم کاکہناہے کہ سیکڑوں لوگوں نے پولنگ اسٹیشن میں گھس کر بیلٹ پیپرز کو آگ لگادی اورپولیس اہلکاروں کااسلحہ بھی چھین لیا ۔کل سے اب تک 200 پولنگ اسٹیشن کو آگ لگا ئی جاچکی ہے ،پر تشدد ہنگاموں میں 11 افراد جان سے گئے۔پارلیمان کی 3 سو نشستوں میں سے 147 پر انتخابات ہورہے ہیں ،جہاں اپوزیشن کے انتخابات میں حصہ نہ لینے پر 153 امیدوار تو بلا مقابلہ ہی جیت چکے ہیں۔دوسری جانب امریکہ، یورپی یونین اور دولت مشترکہ نے بنگلہ دیش میں انتخابات کی نگرانی کرنے کے لیے اپنے مبصرین بھیجنے سے انکار کر دیا ہے، جس کے بعد بنگلہ دیشی حزب مخالف کا کہنا ہے کہ یہ انتخابات قابلِ اعتبار نہیں ہوں گے۔18 ہزار پولنگ اسٹیشن میں ووٹ ڈالنے کا وقت بنگلہ دیش کے مقامی وقت کے مطابق صبح 8 سے شام 4 بجے تک ہے۔

غداری کیس کی سماعت کل پھر ہوگی، پرویزمشرف پیش نہیں ہوں گے

اسلام آباد: پرویز مشرف کے خلاف غداری کے مقدمے کی سماعت کل پھر ہوگی اور سابق صدر  کل بھی عدالت کے روبرو پیش نہیں ہوں گے.

ایکسپریس نیوز سے خصوصی گفتگو کرتے ہوئے سابق صدر کے وکیل احمد رضا قصوری کا کہنا تھا کہ پرویز مشرف کی طبیعت بہتر نہیں، وہ اب بھی اسپتال میں زیر علاج ہیں، اپنی ناساز طبیعت کے باعث کل بھی وہ خصوصی عدالت کے سامنے پیش نہیں ہوسکیں گے تاہم عدالت سے پرویز مشرف کی حاضری سے استثنی کی درخواست کی جائے گی، اس سلسلے میں سابق صدر کی بیماری سے متعلق ڈاکٹرز کی رائے بھی عدالت میں پیش کرسکتے ہیں۔

واضح رہے کہ سابق صدر پرویز مشرف کے خلاف 3نومبر2007 کے غیر آئینی اقدامات پر غداری کا مقدمہ خصوصی عدالت میں زیر سماعت ہے، 2 جنوری کو اپنے فارم ہاؤس سے عدالت روانگی کے بعد راستے میں ان کی طبیعت خراب ہوگئی تھی جس کے بعد سے وہ فوجی اسپتال میں زیر علاج ہیں۔

ہفتہ وار افراط زر کی شرح میں0.17 فیصد اضافہ

کراچی: ملک میں گزشتہ ہفتے حساس قیمتوں کے اشاریے کی بنیاد پر افراط زر کی شرح میں معمولی اضافہ ریکارڈ کیاگیا جس کی بڑی وجہ ٹماٹر اور مرغی کا مہنگا ہونا ہے۔

پاکستان بیوروشماریات کے مطابق گزشتہ 5 ہفتے سے جاری افراط زر کی شرح میں کمی کارجحان ختم ہوگیا اور 2جنوری 2014 کو ختم ہونے والے ہفتے کے دوران افراط زر کی شرح میں ہفتہ وار بنیادوں پر 0.17 اور سالانہ بنیادوں پر 10.13 فیصد کا اضافہ ریکارڈ کیاگیا، اس دوران 12 اشیا کی قیمتوں میں ہفتہ وار بنیادوں پر اضافہ، 10 اشیا کی قیمتوں میں کمی اور 31 اشیا کی قیمتوں میں استحکام رہا، گزشتہ ہفتے ٹماٹر کی قیمتوں میں پھر سے اضافہ دیکھا گیا اور ملک میں ٹماٹر کی اوسط قیمت 16.19 فیصد اضافے کے ساتھ 41.56 روپے سے بڑھ کر 48.29 روپے فی کلوگرام تک پہنچ گئی جبکہ زندہ مرغی کی قیمت بھی 5.89 فیصد بڑھ کر 184.08 روپے فی کلوگرام ہوگئی جو ایک ہفتے قبل 173.84 روپے فی کلوگرام تھی۔

اس دوران دال مونگ 1.34 فیصد، جلانے کی لکڑی 1.28 فیصد، کیلے 0.99 فیصد، دال ماش0.78 فیصد، سادہ بریڈ 0.27 فیصد، گھی (ٹن) 0.14فیصد مہنگا ہوگیا جبکہ پکانے کے تیل کے ٹن، سرسوں کے تیل، دال مسور اور گھی (کھلا) کے دام بھی بڑھ گئے تاہم فی درجن انڈے 5.51فیصد، آلو 4.93 فیصد، چینی 1.53فیصد، پیاز 1.45 فیصد، گڑ 1.41فیصد، ایل پی جی 0.76 فیصد، لہسن0.43 فیصد، گندم 0.40 فیصد، دال چنا 0.16 فیصد اور آٹا 0.03 فیصد سستا ہونے سے 12 اشیا مہنگی ہونے کے اثرات کافی حد تک زائل ہوگئے جس کی وجہ سے 8ہزار روپے ماہانہ تک کمانے والوں پر محض 0.13 فیصد کا اضافی بوجھ پڑا، 12 ہزار کمانے والوں کی جیب پر مہنگائی کے اثرات 0.15 فیصد، 18ہزار تک کمانے والوں کے لیے افراط زر میں 0.16فیصد، 35ہزار تک ماہانہ آمدنی والوں کیلیے 0.18 فیصد اور مہینے میں 35 ہزار سے زیادہ کمانے والوں کیلیے مہنگائی کی شرح میں 0.19 فیصد کا اضافہ ریکارڈ کیاگیا۔

کیوں چکرا گئے نہ ،سَر کے بل گھومنے والا باصلاحیت نوجوان

لندن…یوں تو آپ نے کئی حیرت انگیز کرتب دِکھانے والے باصلاحیت لوگ دیکھے ہونگے لیکن اس نوجوان جیسا ماہر شخص شاید ہی کہیں دیکھا ہو جو اپنے سَر کے بَل تیز رفتاری سے گھومنے کی صلاحیت رکھتا ہے۔برطانیہ سے تعلق رکھنے والا یہ اسٹریٹ پرفارمر اپنے فن کا مظاہرے کرتے ہوئے درجنوں افراد کے سامنے مہارت سے سَرکے بل زمین پر انتہائی تیزی سے گھومنا شروع کرتاہے تو رکنے کا نام نہیں لیتا ۔اس کرتب کے دوران یہ نوجوان ایک بار بھی چکرا کر نیچے نہیں گِرا جو اس کی مہارت کا منہ بولتا ثبوت ہے ۔